الشمس .. غطا ضياها شرشف المغرب
والغيم .. سولف عليهـا ليـن نوّمهـا
والكون .. أسبل ببشت الليل وأستغرب
( علم الفلك ) من ذنوب الكون ماأعظمها
وأنا وفِكـري ومبـريّ القلـم نقـرب
ودْنا نغيض القمـر باللـي بنرسمهـا
بين العسل والقراح بزعمهـا تشـرب
ماكنهم يشربـون الشهـد مـن فمهـا
سلسالها قد عثـا بالنحـر وإستـذرب
يوم ٍ لمس قاعـة الرمـان .. لاعْدَمهـا
قامت تكد الظـلام .. تخـاف لايخـرب
مظهر دجى ضم عنق الشمس وأعتمهـا
وضاعت يديها مابين خْصَلَّهَـا وأعـرب
نور الفجر عن حسده لنـور معصمهـا
وأرخت جسدها بلا إستئذان وإتعـذرب
جاهل جلـس جنبهـا لأجـل إيتعلمهـا
من أبجدية سجون الرمش .. للمهـرب
لخدودها الحمر .. لشفاها .. ولا همها ؟!
تلحفت ... و إتركتنـي حـزة المغـرب
جالس اسولف عليهـا لأجـل أنومهـا
●●●
لا لا تعـذر.. تـرى مـا للعـذر داعـي
السـر ذاع .. وتسنـى للبشـر كشـفـه
كم من رخيص ٍ يكب الصـدق بأسماعـي
وآكذبه .. وأطرده .. وألعنه في وصفـه !
وأقسم وآنا بالغبا .. (مفتون .. ملتاعي )
بإنـي أصـون المـودة وألغـي الكلفـه
والله لو أدري عن اللي بالخفـى ذاعـي !
ماكنت أوصل مواصيلـي .. بـلا وقفـة
هذه حياتك .. وأنـا مـا أغيـر أطباعـي
وهذه حياتي .. وخل القلـب فـي نزفـه
قدمت لك مايغيـض البيـض بذراعـي !!
قلبي .. وأنا آشوف في كفة يـدك رجفـة
شكيـت لكـن نسيـم العشـق ذعذاعـي
ولا هدني ليـن جتنـي ريحـه الصلفـة
ماكنـت أظـن بغديـر الدمـع مرباعـي
وإن الغلى داخلـي ينسـاق لـي حتفـه
قبل أمس واعي .. وأظنك بي بعد واعي ..!
والليل جالس وانـا راسـي علـى كتفـه
وأبوحلـه عـن رفيـق ٍ للعمـر باعـي
ماقـدر اللـي شـراه وسلمـه عطـفـه
بانت عذاريـب حبـه وأعلـن الساعـي
بانه تسلم رسالـة ( غـدر ) مـن كفـه
ياويل قلب ٍ غـرق .. والسبـة شراعـي
يوم إيتمايـل فـرح .. والحـزن بالدفـة
ياسيد البيض .. لا تضغط على اوجاعـي
وأنت إتظاهر .. ودمعات النساء حرفـه !!
يكفـي مـدام الكنيـن اليـوم ماطاعـي
وقام ايتذكـر صـدى صدفـات منكسفـة
صدفة عشقتك .. وصدفة تطلب وداعي !!!
ياشين صدفة .. على ملعون ابو صدفـه
أمسح دموعـك تـرى ماللبكـى داعـي
السر ذايع .. ودمعـات النسـاء حرفـه
●●●
في جنون ٍ يَصفع العقـل .. ويبـادر بالوعيـد!!
ويتمـادى ليـن يفـرض سَطوتـه .. بالإرتجـال
ويتحكم بالجِسـد .. كـن الخلايـا لـه عبيـد ..
يعرفون السمع .. والطاعة .. وحاضر .. وإمتثال !
إستغلـت حالتـي ((بنـت ٍ)) تِفاخـر بالقِصـيـد
لاتِعـزوى كـل بيـت ٍ فيـه بأوصـاف الجمـال
وأسردتلي مـن تِفاصيـل الغـزل مَوقـف فريـد
شاعـر ٍ ... يوصـف خطاهـا لاتِثنّـت بإختيـال
تعرف إني .. مارضيت بغير(شاعرهـا الوحيـد)
وماولِد من قـال أنـا لـك نِـد بأوقـات النِـزال
ومن سِوايا غيرتي ..!! قلت : الجرايـد ماتفيـد؟
(( يحسب إني ماأعرف إنه سرقها من مقـال )).!!
وأضحكت كن الصيـاح بثغرهـا .. أمـر ٍ شديـد
يِلزم الليل إيتنازل عـن ( مفاتيـح ) الوصـال
وأمسكت يدي .. وتابـع صبعهـا خـط الوريـد
لين قـاده للصـدر وأشّـر علـى قلبـي وقـال :
بإسم مولاتي ... أهني الـروح بالنصـر الأكيـد
يوم فازت بإستثارت ( غيرتـك ) بيـن الرجـال
وصدّ عني .. فارس ٍ ماشاف بي خصـم ٍ عنيـد
شـاف شخـص ٍرافـع ٍ رايـة قـدوم الإحتـلال
بعض يدي يرتجـف والبعـض يطمـع بالمزيـد
وشـوف عينـي ماكِفـاه لسـد بـاب الإحتمـال
قلت أنا ماني بوعـي ٍ قابـل إن الإيـد إيـد ..!!
هي أنامل كفها ..؟ ولا حريـر ٍ خِيـط شـال ..؟
إسحرتنـي بالجمـال اللـي خـذانـي للبعـيـد
للسحاب اللـي يـداري بالحضـن روس الجبـال
وإجبرتني أرتكـز .. قالـت : تِأمـل يـا وِليـد
قِس مِسافات الغـرام إن كِنـت راضـي بالخيـال
قلت شوفيلي طِريق ٍ صِنـع مـن عـذب الجليـد
جابني من مِظلمـات الأمـس وبليّـا سـؤال ...!
جيت أقايس هالمسافة.!وأكتشفـت إنـي بليـد!!
دام عقلي من جنون الحـب والعشـق إستقـال ..
●●●
تكتب الريح إسمي .. وسط كف السحـاب
كنها تقول : شوف .. إنك وصلت الجدي !
تدري إن أناظر فـوق .. وقـت الغيـاب
قالت : أحسن أنسيه الحـزن .. ويغـدي
حسّت الريح فيني .. من كبر هالعـذاب !
وأنت ماتدري حتى إن لك رفيق أجـودي !
ليه أحس إن لك بوقت الفرح ألف بـاب ..
وكل ماجيـت بـاب أتعـب أفـك بيـدي
طحت من طولي .. ومار حان وقت الذهاب
أنتظر منك ( يَـد ) .. تجرنـي لسعـدي
طوّل الوقت .. لين إن أصغر إحساس شاب
وأنت تدري .. ومع هـذا رحلـت تعـدي
كانت الناس تنصحني .. وتبـدا العتـاب
وكنت أسج وأفكر .. كيف معـك أبتـدي
لين رحت .. وانا في فمّـي الصـوت ذاب
وصار كل شـي إيتذكـر غلاتـك .. ردي
لو تخاف البراري .. مـن قـدوم الذيـاب
كان خاف الصدر .. يوم ٍ لمسـت جسـدي
ولو تعرف النفوس الطاهرة .. بالصـواب
كان عيّت أواصل .. وإفرشـت مرقـدي
وكان كلمة ( أحبك ) فتّقـت جـرح طـاب
يا كثر ما إنفتق من جرح لي .. يابعـدي
ناظر الريح .. خطـت قصتـي بالسحـاب
كنها تقول : صدق إنـك رفيـق أجـودي
●●●
تخطي وأقول .. إن أنا المخطي ولا أتشرّه !
وتخطي بعد .. وأعذرك وآقـول مايـدري
وفي كل طاري .. يمر تخطي كـذا مـرّه !
وأخاف حملي يزيد .. وينكسـر ظهـري !
جايز .. اكون الحليـم اللـي ظهـر شـرّه
وجايز يكون الغلط منـي .. وذا عـذري .
يا صاحبـي كنـت أحبـك حيـل بالمـره
ولازلت أحبـك .. ولكـن العتـب يطـري
أحيان أشوفك " بعيـد وخايـف آضـره "
وأحيان أشوفك قريب .. إرتاح في صـدري
ليه أسألك عن جـروح القلـب .. والحـرّه
وانت أبخص الناس في جرحي وفي حري
يا صاحبي .. لو مسك كل ٍ علـى سـرّه !
ما كان الأحباب .. سموا حبهم " عـذري "
وأنا تعبـت أسحـب الأحـزان .. وآجـره
وأحفر بأثر جرتي .. قبـر يغـدي قبـري
إمـا تكـون الحبيـب اللـي قـرب مـرّه
ولا عسـى الله يقدرنـي علـى صـبـري
وأنـا أحـبـك .. ولا بـآعـاود الـكـرّه
حتى ولـو كبريائـك .. صـار يستجـري
مإخترتـك تـذوق حلـو بكـاي أو مـرّه
إخترتك .. تحس بأحلى شي فـي عمـري
فـلا تكابـر .. وأنـا ماعـاد بأتـشـره !
وإنت وضميرك .. وفكـر قبـل لا تسـري
●●●
أرجوك .. كل الحكي معروف .. من بدري
مافيه داعي تعيده .. شـوف لـك غيـره
تدري ..! أبآشاركك .. باللي شغل فكـري
وخل السوالف .. ( رحى ).. وقلوبنا تديره
سنتين مرت وأشوف الثالثـة .. تجـري
وحنـا نجامـل .. وكـل ٍ بـان تقصيـره
قد قلت لك من زمان .. إن غبت من عذري
ما قوى علـى الهـم والغربـال والغيـره
وشلـون أبقـوى .. ودم فراقنـا يسـري
بعروق الأيام .. من كان الصدر .. ( ديرة )
لين أثقل الهم كتفـي .. وإنحنـا ظهـري
ودنقّت .. والبال .. طـاح بكفـة الحيـرة
وماشفت . بعيونك النعّاس .. مـن قـدري
غير إني اللـي كِسـر خَاطـر مشاويـره
تذكر .. قبل كم سنة يوم الجفـا يطـري !
وتقول لي : بس عاد .. وفضهـا سيـرة
كنت إنت ..؟ ولا أظن إني أنـا آهـذري ؟
أو هو حلم .. يشتكي من كِـذب تفسيـره
بالحالتين .. الحبر جَف ْ.. بورق عمـري
ولا عاد ينفع نعيد ..اللـي قِضـى خيـره
يا أعز من ب..أتركه للبُعـد .. وأستَـذري
تحت ( إني الطهر .. وإنه درب ما آسيره )
خلاص .. كل ٍ يدور له طريـق .. أدري .!
ما نيب أبشكي .. جعل بفراقنـا خيـرة !
من كم سنة كنت أعز إحساس في صدري
واليوم دار الزمان .. و ( فضها سيـرة )
●●●
ودي أقول حكايـة النـاس والبيـر
وكيف إتعبوا .. لأجل إيتهنون بالمي
وودي أشبهها بنفسي وأنـا آغيـر
وأفهمك .. كيف السحب تقتل الضي
( ودي ) .. وخايف يسمعن العصافير
وتقوم .. وتصحي معاها هل الحـي
نم يا قمر دنياي .. تصبح على خير
خل النهار يحس بإنـه بقـى حـي
كل يوم أحبك غير .. والبارحة غير
بديت أحس إن الخلايق ولا شـي !
إفرح .. إذا طالت علينا المشاويـر
يمكن يزيد الشوق في داخلي شـوي
مدام حبـك .. قسمتـي بالمقاديـر
بأصبر .. وكن حر القوايل معك في
والله .. أحس ان لي جناحين وآطير
لامن ذكرت .. إنك ذخرت الغلا .. لي
خلك وسط قلبي .. لو يصير مايصير
كل الخلايق في وجودك .. ولا شي ..
